Goli me kokë nga Steven Naismith ia siguroi menaxherit të ri të Evertonit, Roberto Martinez fitoren e parë në kuadër të edicionit të ri në Premierligë derisa vendasit arritën të mbrojnë avantazhin duke mposhtur Chelsean e Jose Mourinhos.

Naismith e kaloi Evertonin në epërsi, pak para përfundimit të pjesës së parë kur realizoi me kokë pas shërbimit nga Nikica Jelavic.

Samuel Eto’os iu mohua goli i parë si futbollist i ri i Chelseat kur debutuesi tjetër Gareth Barry e bllokoi goditjen e tij para se portieri Tim Howard ta dëbonte topin. Howard më pas priti një goditje të mesfushorit Ramires para se Leighton Baines ta godiste transversalen në çastet e fundit.

Humbja e Chelseat është e para në Premierligë pas rikthimit të Mourinhos në aventurën e tij të dytë si menaxher i ekipit.