Zëvendëskryeministri i Kosovës, Enver Hoxhaj ka takuar sot ambasadorin e ri të Shteteve të Bashkuara të Amerikës, Philip Kosnett, shkruan lajmi.net.

Përmes një postimi në profilin e tij zyrtar në rrjetin social Facebook, Hoxhaj ka bërë të ditur se me ambasadorin amerikan Kosnett ka biseduar për një dinamikë të re bashkëpunimi mes Kosovës dhe Shteteve të Bashkuara të Amerikës, derisa ka falënderuar ambasadorin për mbështetjen e vazhdueshme ndaj Kosovës.

“Pata nderin ta pres në takim njoftues sot ambasadorin e ri të shteteve të Bashkuara të Amerikës, Philip S. Kosnett. Ambasadorit i shpreha mirënjohjen për rolin jashtëzakonisht të rëndësishëm dhe mbështetjen e ShBA-së për Kosovën. Diskutuam për përmbylljen e shtetndërtimit të Kosovës, dialogun me Serbinë, transformimin e FSK-së, si dhe sfidat me të cilat përballet rajoni aktualisht. Shpreha përkushtimin për thellimin e mëtejmë të miqësisë marrëdhënieve të shkëlqyeshme mes Kosovës dhe Shteteve të Bashkuara të Amerikës”, ka shkruar Hoxhaj në Facebook. /Lajmi.net/