Hetohet ish-kryeinspektori i Ndërtimeve

Ish kryeinspektori i Ndërtimit në Komunën e Prishtinës, Ismet Haliti, dyshohet se ka keqpërdorur detyrën zyrtare. Haliti, dhëndri i ish kryetarit të Komunës, Isa Mustafa, bashkë me zyrtarë të tjerë janë nën hetime për krime ekonomike që nga viti 2011.

Lajme

17/03/2014 07:32

Prokuroria Themelore në Prishtinë ka nisur hetimet ndaj ish-kryeinspektorit të Ndërtimit në Komunën e Prishtinës, Ismet Haliti, i cili dyshohet se ka kryer veprën penale, Keqpërdorim i detyrës zyrtare.

Vet, Kryeprokurori Imer Beka e ka konfirmuar se ndaj këtij personi janë nisur hetimet, të cilat kanë ardhur si pasojë të ngritjes së kallëzimit penal nga Policia.

“Hetimet për lejet e ndërtimit janë aktuale. Ne e kemi një kallëzim penal tani për inspektorin komunal të Ndërtimit, Ismet Haliti. Kallëzimi penal e ka ngritur policia dhe unë e dërgova rastin te prokurorja Ferdane Sulejmani”, ka thënë për KosovaSot, Imer Beka.

Ndërkaq, prokurorja e këtij rasti, Ferdane Sulejmani ka thënë se këtij rasti do t’i japin prioritet.

“Çështja veç sa ka ardhur, mandej lënda ende nuk ka numër. Unë akoma nuk i kam lexuar shkresat, por me siguri do t’i japin prioritet kësaj lënde. Ai (Ismet Haliti) akuzohet për shpërdorim të detyrës zyrtare”.

Hetimet për zyrtarë komunal, që në mesin e tyre ishte përfolur edhe emri i Ismet Halitit, që ndryshe njihet edhe si dhëndri i ish kryetarit të Komunës, Isa Mustafa, kanë nisur nga njësia e krimeve ekonomike që në vitin 2011.

Vetëm nga Inspektorati i Ndërtimit, në njëstimin për krimet ekonomike, deri më tani janë dërguar 50 lëndë.