Kjo e fundit e kishte zyrtarin e tyre që e udhëhiqte Ministrinë e Punëve të Brendshme Skender Hysenin, i cili vazhdimisht ishte shprehur optimist se Kosova shpejt do të jetë pjesë e INTERPOL-it.

Mundësinë për të hequr dorë nga procesi i votimit të anëtarësimit të Kosovës në INTERPOL, e kishte përmendur të mërkurën dhe ministri i Jashtëm Behgjet Pacolli, e që një ditë më pas Qeveria e zyrtarizoi këtë.

Haradinaj është shprehur se ka marrë vendim për ta shtyrë votimin e Kosovës në INTERPOL, duke sqaruar se besimi në Kosovën si anëtare e INTERPOL-it është shprehur në shumë vende, por jo në numër të mjaftueshëm që të anëtarësohet.

Por nënkryetari i Lidhjes Demokratike të Kosovës, Lutfi Haziri, thotë se Qeveria e re e rrënoi një punë 3-vjeçare të cilën e kishte bërë me sukses ish-ministri i tyre Skender Hyseni.

Haziri thekson se Kosova atëkohë e kishte mbështetjen për anëtarësim në INTERPOL, por që u mohua të realizohej nga pushteti aktual.

“Puna 3-vjeçare e ministrit më të suksesshëm të MPB-së, Skender Hysenit, bëri që Kosova të fitojë mbështetjen edhe për anëtarësimin në INTERPOL dhe vetëm për një javë kjo Qeveri e rrënoi sepse bashkësia ndërkombëtare e ka tërhequr mbështetjen për anëtarësim e republikës tonë”, tha Haziri për Express të premten.

Komiteti Ekzekutiv i INTERPOL-it kishte vendosur që kërkesa e Kosovës për anëtarësim në këtë organizëm ndërkombëtar policor të hyjë në agjendën e Asamblesë së Përgjithshme të INTERPOL-it që do të mbahet prej 26 deri më 29 shtator në Pekin të Kinës.

Por, sipas Pacollit, pala kosovare nuk ka arritur as të sigurojë viza për të shkuar atje.