Greqia pro anëtarësimit të Shqipërisë në BE brenda presidencës greke
Kryeparlamentari i Greqisë, Evangelos Meimarakis, i cili ndodhet për vizitë në Tiranë, deklaroi se Greqia dëshiron që Shqipëria ta marrë statusin “kandidat” për në BE, brenda presidencës greke të Bashkimit Evropian.
Lajme
Gjatë vizitës në Shqipëri, me ftesën e kreut të Parlamentit shqiptar, Ilir Meta, Meimarakis bëri të ditur se ndër objektivat e presidencës greke është që Shqipëria të arrijë të marrë statusin kandidat brenda qershorit.
“Siç ndihmuam që Shqipëria të anëtarësohet në NATO, me më shumë forcë e dëshirë do të bëjmë ç’është e mundur që ajo të bëhet kandidate për në BE brenda presidencës sonë”.
Nga ana e tij, Ilir Meta deklaroi se marrëdhëniet mes Shqipërisë dhe Greqisë po përjetojnë një fazë dinamike dhe të frytshme.
“Këto dy vende i bashkon ura e shkëlqyer e miqësisë dhe e bashkëpunimit, që mishërohet nga minoriteti grek në Shqipëri dhe komuniteti shqiptar në Greqi, ndaj ruajtja dhe kultivimi i vlerave gjuhësore dhe arsimore reciproke ka rëndësi të veçantë për dy popujt dhe vendet tona”, u shpreh Meta.
Gjatë kësaj vizite, kryeparlamentari grek u takua me presidentin, Bujar Nishani, ndërsa pritet të takojë edhe kryeministrin, Edi Rama, dhe kreun e opozitës, Lulzim Basha. Ai do të takojë gjithashtu deputetë dhe zëvendësministra të PBDNJ, përfaqësues të minoritetit dhe kryepeshkopin Anastas Janullatos.