Në vitin 2008, katër autore u mblodhën për ta adresuar pyetjen e vjetër disa dekada, të parashtruar nga historianja e artit, Linda Nochlin: “Pse nuk ka pasur artiste të mëdha?”.

Autoret nuk kishin për synim që ta vërtetonin faktin historik se burrat e kanë dominuar artin botëror. Përkundrazi, Eleanor Heartney, Helaine Posner, Nancy Princenthal dhe Sue Scott, dëshironin që metodologjikisht ta hulumtonin realitetin e ri të artit pas shfaqjes së lëvizjeve feministe, duke e analizuar zhvillimin dhe suksesin e grave në këtë fushë.

Kjo iniciativë rezultoi me ribotimin e përplotësuar të veprës After the Revolution: Women Who Transformed Contemporary Art, (publikimi i parë ishte në vitin 2007), i cili i dedikohet karrierave të 12 artisteve me ndikim në pjesën e dytë të shekullit 20, duke përfshirë Louise Bourgeois,  Shirin Neshat dhe Marina Abramovic.

Derisa After the Revolution ishte një formë e homazhit për gjeneratën më të hershme të grave artiste, vepra e botuar këtyre ditëve, The Reckoning: Women Artists of the New Millennium, ka për qëllim t’i prezantojë punimet e artisteve bashkëkohore.

The Reckoning paraqet të arriturat e 24 artisteve që kanë lindur pas vitit 1960, dhe është i ndarë në katër kapituj: Bad Girls eksploron nocionet jokonvencionale të gjinisë dhe racës; History Lessons merret me rolin e individes dhe globalizimit, Spellbound përfshin veprat irracionale dhe surreale, ndërsa artistet që i qasen çështjeve të shtëpisë dhe familjes gjenden në Domestic Disturbances.

Përmbledhja The Reckoning tregon se gratë artiste jo vetëm që janë bërë pjesë e hapësirës kanonike e cila dikur ishte e rezervuar ekskluzivisht për burrat, por ato në mënyrë aktive e kanë zhvilluar botën e artit bashkëkohor, duke përdorur mediumet të reja për ta zgjeruar të konceptuarit tonë të artit.

 A.M.

Artistet e prezantuara në The Reckoning.