Fule: BE pret zgjedhje të drejta dhe demokratike nga Kosova
Komisionari për Zgjerim i Bashkimit Evropian, Stefan Fule, i cili sot po qëndron në Kosovë, ka marrë pjesë në takimin e Këshillit Kombëtar për Integrime Evropiane. Ai me këtë rast ka thënë se BE pret që Kosova të organizojë zgjedhje të drejta dhe demokratike.
Lajme
Fule gjithashtu ka vlerësuar si të suksesshëm përmbylljen e negociatave për MSA.
Ndërsa, presidentja e Kosovës, Atiftete Jahjaga në këtë këshill tha se mbyllja e negociatave për MSA-në është themel për Integrime tutje në BE, duke kërkuar intensifikim të angazhimeve për liberalizim të vizave për qytetarët e Kosovës, e duke vlerësuar se qytetarët e Kosovës nuk e rrezikojnë askënd dhe kërkojnë të jenë të barabartë me qytetarët e shteteve tjera të rajonit.
Jahjaga është shprehur se mbetet e përkushtuar për promovim për tërheqjen investitorëve, gjithashtu do të jetë e pa kompromis ndaj dukurive negative që po e ngadalësojnë zhvillimin e vendit.
Ajo tha se zgjedhjet do të dëshmojnë demokratizimin e vendit. Ajo ka falënderuar Fulen për përafrimin e Kosovës në agjendën e BE-së.
Kurse, kryeparlamentari, Jakup Krasniqi, ka prezantuar punën e Kuvendit të Kosovës dhe një varg ligjesh të miratuara, duke përmendur edhe disa prej tyre që nuk kanë arritur të përfundohen brenda këtij mandati legjislativ, e me theks atë për zgjedhjet.
Kryeministri i Kosovës, Hashim Thaci, dhe liderët e partive politike në takimin e Këshillit Kombëtar për Integrime Evropiane dhe para komisionerit Fule, kërkuan liberalizimin e vizave për qytetarët e Kosovës.