FMN e kënaqur me të arriturat e ATK-së
Ministri i Financave Besim Beqaj është takuar sot me Misionin e Fondit Monetar Ndërkombëtar, të udhëhequr nga Enriko Aav i cili ka qëndruar në Kosovë me qëllim të ofrimit të asistencës teknike për Administratën Tatimore të Kosovë.
Lajme
Kështu thuhet në një njoftim të Ministrisë së Financave, ku thuhet ndër të tjera se ministri Beqaj ka falënderuar ekipin e FMN-së për përkrahjen e deritashme për ATK-në dhe ka shprehur bindjen se bashkëpunimi i suksesshëm do të vazhdoj edhe në vitet në vijim.
Në njoftim, thuhet po ashtu se ministri Beqaj informoi përfaqësuesit e FMN-së mbi të arriturat e fundit të ATK-së si dhe për orientimet strategjike për vitet në vijim.
Ndërsa nga ana tjetër, Aav tha se FMN është shumë e kënaqur me të arriturat e deritanishme të ATK-së dhe thuhet të ketë shprehur falënderimin për mikpritjen dhe bashkëpunimin e deritanishëm.
Për më tepër, Aav, thuhet të jetë zotuar se ekipi i tij dhe FMN do të vazhdojnë të përkrahin ATK-në edhe në vitet në vijim, si në përgatitjen e Planit Strategjik të ATK-së, ashtu edhe në implementimin e tij.