Nga marrëveshja për demarkacionin me Malin e Zi, Kosova ka humbur  82.3 km katrorë. Ky është përfundimi që kanë nxjerrë profesorët universitar Florim Isufi së bashku me kolegun e tij Shpejtim Bulliqi.

Profesori i Gjeografisë në Universitetin e Prishtinës, Florim Isufi në një intervistë për lajmi.net ka thënë se të gjeturat e tyre janë të bazuara në fakte shkencore, dhe hulumtimi i tyre është bazuar nga kjo fushë, duke lënë anash aspektet tjera, si ato politike, patriotike e nacionaliste.

Isufi tregon se të gjeturat e tyre përputhen edhe më të dhënat që ka publikuar edhe Qeveria e Malit të Zi.

“Nga rezultatet tona del se territori i Republikës së Kosovës ndryshon, apo siç themi ne tkurret diku për nga 8 e 229 hektarë, ose  dikur rreth 82.3 km katrorë”.

“Më vonë pas nënshkrimit të marrëveshjes, qeveria e Malit të Zi e ka publikuar rezultatin në faqen zyrtare dhe ato të dhëna përputhen me tonat”, thotë Isufi për lajmi.net.

Pa dashur shumë të komentoj aspektin polik të kësaj marrëveshje dhe deklaratat e qeveritarëve  se Kosova, nuk ka humbur asnjë kilometër nga kjo marrëveshje, Isufi thotë se ata flasin me gjuhën e argumenteve.

“Ka dallim mes asaj se çfarë thotë shkenca dhe politika. Ne bazohemi në fakte dhe mirëpresim dikë që mund t’i hedh poshtë këto të dhëna”.

Mbi 82 km katrorë të humbur nga kjo marrëveshje, Kosova i bie që ka humbur një autostradë nga Prishtina deri në Kukës me gjerësi i 1 km apo 74 km lumë.

“Nëse i përkthejmë këto kilometra, atëherë mund të konkludohet se mund të jetë një autostradë 1 km e gjerë, nga qendra e Prishtinës deri te ajo e Kukësit”.

“Kosova ka humbur 74 km lumë të rrjedhjeve të përhershme  dhe të përkohshme. Pra me përkthye në gjuhën e popullit krejt uji që i nevojitet rajonit të Pjesës mbetet nën juridiksionin e dikujt tjetër”, ka thënë Isufi.

Ai gjithashtu hedh poshtë edhe pretendimet e opozitës dhe banorëve të zonës së Rugovës.

Profesori i gjeografisë, cili së bashku me kolegun e tij, në punimin e tyre u janë referuar të dhënave të shteteve të ish-Jugosllavisë dhe asnjë nga ato shqiptare, për të ikur paragjykimit të rezultatit, thotë se sipërfaqja të cilën e thotë opozita dhe banorët e anës së Rugovës, se ka humbur Kosova nga kjo marrëveshje, nuk qëndron.

“Aspak nuk pajtohemi me asnjërën palë, sepse nuk mendojmë që ndonjëra prej këtyre palëve jep ndonjë rezultat të bazuar në rezultate shkencore”, ka deklaruar ai.

Isufi po ashtu në këtë intervistë ka hedhur poshtë zërat që këmbëngulin se kufijtë duhet të caktohen në bazë të vitit 1974.

Ai ka thënë se në këtë vit nuk ka pasur modifikim të kufijve të shteteve të ish-Jugosllavisë, dhe sipas tij ky është vetëm një term.

“Duhet ta dijë opinioni dhe të gjithë të tjerët, hartë të vitit 1974 nuk ka. Kjo është vetëm term, nuk ka pas përcaktim të kufijve të vitit 1974. Unë nuk mbaj mend dhe nuk kam hasur material i cili tregon se ka pasur përcaktim të kufjeve”.

“Kufijtë administrativ në ish-Jugosllavi  janë përcaktuar mbas Luftës së II-të Botërore dhe zyrtarisht nuk janë modifikuar kurrë”.

“Me kushtetutë të ish-Jugosllavisë dhe me Kushtetutë të vitit 1974 kurrë s’janë modifikuar”, ka thënë ai në intervistën për lajmi.net.