Fillon vlerësimi i aplikacioneve të projekteve bujqësore
Sot në objektin e ish-bankës së Lubjanës, kati IV, në qendrën mediale të KQZ-së, Ministria e Bujqësisë, Pylltarisë dhe Zhvillimit Rural, përkatësisht Agjencia për Zhvillimin e Bujqësisë, do të mbajë konferencë për media, me rastin e fillimit të procesit vlerësues të projekteve bujqësore, të cilat presin mbështetje përmes masave mbështetëse të “Programit për Bujqësi dhe Zhvillim Rural 2018”.
Lajme
Në këtë konferencë, do të marrin pjesë Ministri i MBPZHR-së, Nenad Rikalo, u.d i Kryeshefit Ekzekutiv të AZHB-së, Ekrem Gjokaj, donatorë të huaj, të cilët e kanë përkrahur “Programin për Bujqësi dhe Zhvillim Rural 2018”, si dhe përfaqësues të organizatave joqeveritare në vend.
Gjatë kësaj konference, e cila organizohet për herë të parë, me qëllim të transparencës së procesit vlerësues, u.d i Kryeshefit Ekzekutiv të AZHB-së, Ekrem Gjokaj së bashku me ekipin e zyrtarëve, të cilët bëjnë vlerësimin e këtyre aplikacioneve, do të demonstrojnë në mënyrë të detajuar dhe transparente fillimin e vlerësimit të projekteve bujqësore.