Të dhënat u bënë të ditura nga zëvendësministrja e Financave Irena Beqiraj, gjatë një konference për shtyp të mbajtur paraditen e sotme. Reagimi i Financave vjen dy ditë pas protestës së ndodhur të enjten para Kuvendit të fermerëve të Korçës dhe Devollit të cilët u ankuan se nuk po gjejnë treg për shitjen e prodhimeve të tyre bujqësore. Zv. ministrja Beqiraj tha se reforma në bujqësi e nisur nga qeveria në gusht të vitit të kaluar, tenton formalizimin e sektorit të prodhimit bujqësor, ku kërkohet pajisja me NIPT e fermerëve. Sipas saj kjo reformë iu siguron treg fermerëve, pasi iu jep atyre mundësinë ta shesin produktin me çmim të plotë.

“Është rritur konsumi i prodhimeve vendase të agrobiznesit dhe konkretisht janë ulur me 10 % importet e fruta-perimeve vetëm për 8 mujorin, me 7.5 % produktet e mishi t; me 4 % përgatitjet e brumit. Eksportet janë rritur me 14.35 milionë dollarë vetëm për 8 mujorin ose ndryshe 44.15 % në krahasim me vitin 2014. Dhe kuptohet më lejoni të shpjegoj që produkti i agrobiznesit është sezonal, një pjesë e mirë e fermerëve të zonës së Korçës sidomos, është shumë e rëndësishme, deri në mars sepse kanë qepën, kanë pataten dhe mendojmë dhe presim në të njëjtën kohë që efektet e kësaj reforme të vazhdojnë të rriten,” tha Irena Beqiraj.

Më 28 gusht 2014, u bënë ndryshime në ligjin për TVSH-në duke i dhënë mundësi të gjithë grumbulluesve të prodhimeve bujqësore, të vetëfaturonin produktin e marrë nga fermerët të pajisur me Nipt.  Zv.ministrja shpjegoi se të gjithë fermerët me xhiro poshtë 5 mln lekësh mund të pajisen me numër Nipt pranë drejtorive rajonale dhe ai është numër identifikimi që grumbulluesit përdorin kur bëjnë autofaturat e tyre. Ajo shtoi se janë rritur kërkesat e fer merëve për tu pajisur me NIPT.

“Të gjithë fermerët me xhiro poshtë 5 mln lekësh mund të pajisen me numër Nipt pranë drejtorive rajonale dhe ky numër është numër identifikimi që grumbulluesit përdorin kur bëjnë autofatura e tyre. Ky 20 për qindëshi i TVSh-së (për faturën që vet mbush grumbulluesi) është subvencion total i fermerit të pajisur me Nipt. Ndërkohë që veç kësaj ajo që bëri kjo reformë jo vetëm i dha mundësi fermerit ta shiste produktin e vet me çmimin e plotë, përfshirë dhe TVSH po i dha mundësi të gjithë grumbulluesve të njihnin TVSH e kreditueshme dhe si shpenzim të gjithë vlerën e produktit pa TVSH të blerë nga fermeri”, bëri të ditur Beqiraj./Kp