Presidenti i Turqisë, Recep Tayyip Erdoğan, është shprehur se kanë vendosur t’i tërheqin trupat turke nga stërvitja e NATO-s në Norvegji pas një incidenti në këtë vend, raporton Anadolu Agency (AA).

“Dje në Norvegji ka ndodhur një incident. Në Norvegji kanë vendosur një tablo, si tablo armiqësore. Aty ndodhej fotografia e Ataturkut dhe, në anën tjetër, emri im. Pra, ishin objektiv”, tha Erdoğan në një takim të krerëve të qyteteve në selinë e Partisë për Drejtësi dhe Zhvillim (AK Parti) në Ankara.

“Pasi morën këtë informacion, shefi i shtabit dhe ministri përgjegjës për BE-në që ndodheshin në udhëtimin për në Kanada më telefonuan dhe më njoftuan për rastin dhe më thanë se kanë vendosur të tërheqin ushtarët, të cilët janë rreth 40, në stërvitjen e NATO-s, ndërsa unë u thash që gjithsesi ta bejnë një gjë të tillë dhe të mos presin aspak. U thash që edhe sikur ato objektiva të hiqen, të tërheqin menjëherë 40 ushtarët tanë. Nuk mund të ketë një aleancë, një aleat të tillë”, shtoi presidenti turk.

Ndër të tjera, në lidhje me rajonin Afrin në Siri, Erdoğan tha: “Ne duhet të pastrojmë Afrinin, ku aktualisht ndodhet organizata terroriste PYD dhe pranë saj YPG-ja. Kjo është një çështje që e kemi shprehur që në fillim. Ne, kryesisht në pikat vëzhguese atje (Idlib), do të ndodhemi si element që dominojmë. Jemi të detyruar për këtë. Nëse ne nuk ndodhemi atje si element dominues, atëherë grupe të tjera terroriste do të vijnë atje dhe do të përpiqen ta okupojnë”.

“Nuk dëshirojmë të vihemi në lojë në Afrin”

Në fjalën e tij, Erdoğan e ka quajtur zhgënjim faktin që SHBA-të nuk kanë mbajtur premtimet lidhur me krizën në Siri.

“Është një zhgënjim i madh për ne që Amerika të mos mbajë një pjesë të madhe të premtimeve që ka bërë që nga fillimi i krizës siriane. Edhe tani nuk dëshirojmë të vihemi në të njëjtën lojë në Afrin. Për fat të keq, shumë probleme që mund t’i zgjidhim shumë lehtë në kuadrin e marrëdhënieve si aleatë, janë zvarritur drejt moszgjidhjes me këmbëngulje nga Amerika. Ngjarja e Rakkas është e tillë, e po ashtu edhe e Munbixhit, e Dejrizorit janë të tilla”, tha Erdoğan.

Presidenti Erdoğan ka rikujtuar se SHBA-të aktualisht kanë pesë baza ajrore në veri të Sirisë dhe tetë baza normale. “Edhe tani po formon një në Rakka, pra, gjithsej bëhen 14 baza. Këto janë të vërteta që dihen. Përse vallë vini në Siri nga një largësi prej 12 mijë kilometrash? A nuk mund të parashtrohet kjo pyetje?”, shtoi Erdoğan.

“Ai që ka shpikur DEASH-in, ai e ka formuar edhe PYD-në. Ai që i dha shtytje PYD-së është ai që dëshiron të thellojë destabilizimin e Irakut duke e zvarritur qeverinë e Irakut të Veriut drejt shpalljes së pavarsisë. Gjithashtu, nuk duhet të harrojmë se po të njëjtat forca vazhdojnë të ushqejnë dhe të rrisin brenda mburojave të tyre të mbrojtjes FETO-n”, theksoi Erdoğan.

Duke bërë të ditur se lufta kundër terrorizmit do të vazhdojë deri në shkatërrimin ose dorëzimin edhe të terroristit të fundit Erdoğan tha se “Nuk do të kemi aspak mirëkuptim për këdo që drejton armën drejt Turqisë dhe qytetarëve të saj, as për këdo që ka këtë qëllim”.