Një grup prej 12 emigrantëve të cilët kanë hyrë në Hungari në mënyrë ilegale, janë zënë nga policia e rrethit të Csongrad, këtë fundjavë në qytetin jugor të Morahalon, i cili ndodhet jo shumë larg qytetit të Szeged.

Policia njofton se emigrantët kanë ardhur nga Afrika e Veriut, Kosova, Pakistani dhe Afganistani.

Emigrantët ilegalë janë gjetur të fshehur në një automjet udhëtarësh i cili raportohet të jetë i vjedhur në Itali, ka qenë duke u drejtuar nga një 21 vjeçar nga Novi Sadi, detyra e të cilit ishte që t’i dërgonte këta persona në Vjenë të Austrisë.

Zsuzsanna Veg e cila është drejtoreshë e Zyrës për Emigracion dhe Nacionalitete, tha se kufiri i Hungarisë me Serbinë, është pika kyçe prej nga emigrantët hyjnë në Hungari, posaçërisht personat që kërkojnë statusin e refugjatit. Sipas saj, shumica e tyre nuk kanë mundur ta presin kohën për aplikimin për azil dhe janë larguar nga vendi para se procesi i dhënies së azilit të përfundojë.