Deklarata e tyre u shpërnda sot në media pikërisht në ditën kur Kryeministri Edi Rama mblodhi deputetët e PS të Komisionit të Ligjeve për këtë çështje.

Është e paqartë se kush u kërkoi dy misioneve të huaja të dalin me një deklaratë publike për “kokën” e Llallës, kur nuk mbajnë asnjë përgjegjësi ligjore dhe as morale për zgjedhjen e kreut të akuzës shqiptare.

Sipas procedurës parlamentare, zgjedhja e Prokurorit të Përgjithshëm shqyrtohet paraprakisht nga Komisioni i Ligjeve. Në praktikën e këtij Komisioni, janë shënuar shpesh raste kur për çështje të ndryshme, kërkon mendimin e ekspertëve, përfshirë edhe atyre ndërkombëtarë.

Në rastin konkret, Komisioni Parlamentar i Ligjeve ende nuk ka hapur procedurë për zgjedhjen e Prokurorit të Përgjithshëm. Rrjedhimisht, nuk u është kërkuar mendim OPDAT-it dhe EURALIUS-it.

Rekomandimet

OPDAT dhe EURALIUS deklarojnë se dispozitat kalimtare përcaktojnë të drejtën dhe detyrimin e Kuvendit të zgjedhë një prokuror të lartë, i cili i plotëson kërkesat e neneve 22 deri 27 të Ligjit për organizimin dhe funksionimin e prokurorisë, si prokuror i përkohshëm me shumicë të thjeshtë, në prani të më shumë se gjysmës së të gjithë anëtarëve të Kuvendit.

“Nuk ka autoritet kushtetues ose ligjor për Parlamentin që të zgjasë mandatin e Prokurorit të Përgjithshëm aktual, mbas skadimit të mandatit të tij. Përkundrazi, ekziston një dispozitë e qartë që urdhëron emërimin e një Prokurori të Përgjithshëm të përkohshëm”, thuhet në deklaratë.