Edhe aeroplanë britanikë sulmojnë caqet e IS në Irak
Ministri britanik i Mbrojtjes, Michael Fallon ka thënë se avionët luftarakë të Britanisë kanë kryer të martën sulmet e para ajrore kundër militantëve të “Shtetit Islamik” në Irak.
Bota
Fallon ka thënë se dy aeroplanë luftarakë të Britanisë “kanë identifikuar dhe sulmuar një pozicion të armëve të rënda”, që rrezikonte forcat kurde në veri të Irakut.
Radio Iraku i Lirë raporton se aeroplanët britanikë kanë fluturuar edhe mbi qytetetin Garma dhe Falluxha të provincës Anbar, të cilat janë nën kontrollin e militantëve islamikë, por të rrethuara nga forcat qeveritare të Irakut.
Të martën, sulmet ajrore të SHBA-ve dhe të forcave irakiane kanë goditur militantët e “Shtetit Islamik” edhe në perëndim dhe jug të Bagdadit, ku raportohet se kanë humbur jetën dhjetëra luftëtarë.