Për Presidenten e Kosovës, Atifete Jahjaga, kjo ka qenë një javë e ngarkuar me çështje që kanë të bëjnë me Komisionin Qendror të Zgjedhjeve.

Kur kanë mbetur vetëm pesë javë deri në mbajtjen e zgjedhjeve lokale, ky Komision është zhytur në telashe.

Pak ditë pasi Presidentja Jahjaga e kishte marrë dhe ishte duke e shqyrtuar një ankesë të ardhur nga Kryesuesja e Komisionit Qendror të Zgjedhjeve për sjelljet e anëtarit të KQZ’së nga Vetëvendosje, Adnan Rrustemi, është Vetëvendosje e cila është ankuar me shkrim te Zyra e Presidentes kundër Valdete Dakës.

Zëdhënësi i Presidencës, Arbër Vllahiu, ka konfirmuar për lajmi.net se Vetëvendosje ka dërguar një letër në Zyrën e Presidentes me të cilën kritikon Kryesuesen e KQZ’së.

“Po shqyrtohen të gjitha kërkesat dhe ankesat që kanë ardhur në Zyrën e Presidentes nga Kryetarja e KQZ’së dhe Vetëvendosje. Pasi të shqyrtohen ato, do të jepet një qëndrim”, ka thënë zëdhënësi Vllahiu.

Kërkesa e Vetëvendosjes vie pak ditë pasi Daka kishte dërguar në Presidencë një kërkesë të veten që Presidentja t’i shqyrtojë sjelljet e anëtarit të kësaj Lëvizjeje Adnan Rrustemi brenda mbledhjeve të KQZ’së.

Një burim i lajmi.net kishte treguar se Valdete Daka nuk ka kërkuar decidivisht shkarkimin e Rrustemit, por, në njëfarë mënyre, e ka nënkuptuar një kërkesë të tillë.

Konflikti Daka-Rrustemi ka nisur të martën gjatë mbledhjes së KQZ’së kur ky i fundit po insistonte që në rend të ditës të futej një pikë që kishte të bënte me listën e votuesve, e cila nuk qe pranuar nga anëtarët tjerë të Komisionit.

Teksa po diskutonin për çështjen e listës së votuesve në KQZ, debati Rrustemi-Daka kishte degjeneruar në atë që u vlerësua si kërcënim.

“Ti veç je femër, se kurrë në jetën tënde nuk kishe guxu në këtë mënyrë me m’u drejtu”, i kishte thënë Rrustemi kryesueses së KQZ’së.