Dridhet Barcelona
Humbjet e njëpasnjëshme në La Ligë kanë ndezur alarmin në Barcelonë. Sipas të përditshmes sportive madrilene “AS”, futbollistët janë të pakënaqur me trajnerin Luis Enrique.
Sport
Dy humbje të njëpasnjëshme në La Ligë, për herë të parë pas pesë vitesh, kanë ngritur alarmin në Barcelonë. Dhe, nëse duhet t’i besojmë të përditshmes sportive madrilene “AS”, faji qëndron tek raporti i zbehur mes trajnerit Luis Enrique dhe futbollistëve.
Gazetari i “AS”, Santi Jimenez ka paralajmëruar se në ekipin e Barcelonës ka futbollistë që janë të pakënaqur me Enriquen.
“Kemi ardhur në Bernabeu pa një plan, nuk e kuptojmë se çfarë kërkon prej nesh. Nuk flet me askënd, aspak nuk diskutojmë”, thuhet të jetë përmbajtja e një mesazhi që i ka mbërritur Jimenezit nga një futbollist i Barcelonës.
Barcelona me Enriquen e filloi mirë sezonin, por më pas humbi në El Clasico nga Real Madrid dhe në fundjavë u befasua në shtëpi ku u mposht nga Celta Vigo, duke ngritur alarmin tek tifozët dhe ambienti i gjigantit katalan.