Dikur rekomandimi për vizat festohej me shampanjë, tash me tortë /FOTO
Në Odën e Ekonomike të Kosovës sot është kremtuar rekomandimi i Komisionit Evropian për liberalizimin e vizave për qytetarë të Kosovës.
Lajme
Është prerë edhe torta e janë thënë fjalë të mira për këtë që tashmë nga politikanët e quajnë “lajm të mrekullueshëm”.
Foton nga ky manifestim në Facebook e ka publikuar kryeministri i vendit Ramush Haradinaj.
Më herët, respektivisht në vitin 2016 atëherë kur u pat dhënë rekomandimi i parë nga Komisioni Evropian për vizat, në Kosovë u pat festuar me shampanjë, shkruan lajmi.net.
Ishte ish ministri i Integrimeve, Bekim Çollaku aso kohe e pat hapur shampanjë në shenjë festimi, mirëpo ishte kushti i demarkacionit që bllokoi liberalizimin e vizave.
Postimi i Haradinajt në Facebook:
“Liberalizimi i vizave, qytetarëve të Kosovës ua lehtëson jetën, dhe veçanërisht është lajm i mrekullueshëm për bizneset në vend.
Në vizitën e sotme në Odën Ekonomike të Kosovës, rikonfirmova përkushtimin e Qeverisë për të rritur parametrat në ekonomi, si dhe për të vazhduar partneritetin me sipërmarrësit dhe bizneset.
Bizneseve në vend me ndërtimin e termocentralit “Kosovës së Re” u garantohet stabilitet energjetik. Po ashtu, kemi ndërmarrë hapa konkret në përmirësimin e infrastrukturës rrugore dhe hekurudhore që na lidhë me shtetet fqinje e më gjerë. Komunave u kemi siguruar hapësirë të veçantë për zona ekonomike. Kurse, politikat fiskale i kemi ndër më të mirat në rajon.
Ekonominë po e orientojmë drejt partnerëve tanë strategjikë dhe me lëvizjen e lirë në vendet e BE-së do të fuqizohen lidhjet ekonomike me Europën”.