Dhuna mes bandave, që është përhapur së fundmi nëpër qytetet angleze, koinçidon me rritjen e madhe të sasive të kokainës nga mafia shqiptare, e sjellë përmes lidhjeve me kartelet amerikano-latine të drogës, sipas të dhënave të publikuara nga “The Times”.

Në listën e 4.600 sindikatave kriminale më të rrezikshme në Britani, gjatë 3 viteve të fundit kriminelët britanikë janë ende më mbizotëruesit, por shqiparët kanë lënë pas, për herë të parë vitin e kaluar, rumunët. Dihet se rumunët janë më të shumtë në numër, si kombësi në Britani. Në këtë listë, nga afro 33.600 kriminelët, shqiptarët kaluan nga vendi i 8 në vendin e tretë.

Sipas të dhënave të organizatës me qendër në Londër, “Global Drug Survey”, kokaina shpërndahet te klientët në më pak se 15 minuta në Angli dhe Skoci, ku përdoruesit thonë se ajo mbërrin tek ata më shpejt se ç’mbërrin mesatarisht një picë e porositur përmes telefonit ose “online”.

Sipas “The Times”, shqiptarët kanë krijuar një reputacion të frikshëm, si njerëz që të mbarojnë punë dhe ekspertë logjistikë përmes qasjes tek armët dhe aftësisë së tyre për të përballuar përmes forcës grupet rivale.