Dështon Roma, Juventusi kampion
Roma ka humbur nga Catania 4:1, duke ia mundësuar Juventusit të shpallet kampion i Italisë, dy xhiro pa përfunduar sezoni. Bianconeri kanë tetë pikë më shumë se Giallorossi.
Sport
Roma është dorëzuar përfundimisht. Giallorossi u mposhtën nga Catania të dielën me rezultat 4:1, duke ia mundësuar Juventusit që të shpallet kampion i Italisë, ende pa e zhvilluar ndeshjen e xhiros së 36-të.
Vetëm dy xhiro pa përfunduar sezoni, Bianconeri kanë tetë pikë më shumë se Roma, e cila me këtë rast duhet të kënaqet më pozitën e dytë.
Mariano Julio Izco ka realizuar dy gola për Catanian, ndërsa nga një tjetër e shtuan Gonzalo Bergessio e Pablo Barrientos.
Ndërkaq, golin e pamjaftueshëm për ekipin e Rudi Garcias e shënoi kapiteni Francesco Totti.
Juventusi do të luajë të hënën ndaj Atalantas pa kurrfarë presioni, vetëm për prestigj.