Paneli Zgjedhor për Ankesa dhe Parashtresa (PZAP) deri më tash ka pasur mjaft punë.

Tashmë janë shqiptuar dënimet e para për subjektet politike, gjoba këto që kapin shumën e mijëra eurove dhe që kryesisht kanë të bëjnë me shkeljen e rregullores për vendosjen e posterëve.

Partia Demokratike e Kosovës dhe Lidhja Demokratike e Kosovës prijnë me dënime, me nga katër.

Ndërsa, nga një gjobë ka marrë Aleanca për Ardhmërinë e Kosovës dhe Nisma Qytetare e Ferizajt.

PDK është gjobitur me 21 mijë e 300 euro, LDK me 20 mijë e 700 euro, AAK me 800 euro dhe Nisma Qytetare e Ferizajt është gjobitur me 250 euro.

Sipas Kryetarit të PZAP’it, Shukri Sylejmani, i cili ka folur për “Radio Kosovën”, në këtë panel kanë arritur 80 ankesa nga subjektet politike, shumica e të cilave kanë të bëjnë për fushatën zgjedhore, por disa prej tyre janë edhe për fushatën parazgjedhore.

Karakteristikë e këtyre zgjedhjeve, sipas tij, është se të gjitha subjektet politike janë ankuar.

“Në këto zgjedhje është karakteristike që nga të gjitha subjektet paraqiten ankesa, për dallim nga zgjedhjet e kaluara. Kryesisht kanë të bëjnë me vendosjen e posterëve nëpër vendet dhe objektet e ndryshme publike, nëpër shenjat e komunikacionit, në disa raste kanë të bëjnë me vendosjen e posterëve mbi posterë të kandidatëve të tjerë, aty këtu disa ankesa kanë të bëjnë me grisjen e posterëve”, ka thënë Sylejmani, për “Radio Kosovën”.

“Kemi shqiptuar dënime të caktuara, kemi shqiptuar disa subjekteve politike. Kemi shqiptuar për shembull dënime prej 5 mijë e 100 euro, 5 mijë e 50 euro, por ka ndodhë që kemi shqiptuar edhe dënim prej 50 eurove”.

Sipas PZAP, ankesat kanë ardhur kryesisht nga qytetet e Ferizajt, Deçanit dhe Lipjanit.

Sipas vendimeve të PZAP’it subjektet obligohen që të paguajnë gjobat 15 ditë nga data e shqiptimit të gjobës. Shumica e ankesave ky panel i ka shqyrtuar, dhe ato që kanë mbetur pritet të shqyrtohen në ditët në vijim.