Siç raportohet, Dell do të largojë nga puna 20% të stafit të shitjes në SHBA dhe 30% të stafit të shitjes dhe marketingut në Europë, Lindje të Mesme dhe Afrikë. Akoma nuk dihet shifra e saktë e punëtorëve që do të pushohen nga puna.

Dërgesat e kompjuterëve personalë në botë (Dekstop e Laptop) kanë shënuar rënie të njëpasnjëshme në 7 çerekvitet e fundit. Kjo rënie është ndikuar sidomos nga tabletët dhe smartfonët.

Dërgesat globale të kompjuterëve personalë në vitin 2013 kapën shifrën e 315.9 milionë njësive, 10% më pak se në vitin 2012. Lenovo mban primatin si shitësi më i madh në vitin 2013, HP ka vendin e dytë, kurse DELL është radhitur në vendin e tretë.

Në një deklaratë në lidhje me pushimet nga puna, kompania DELL mes tjerash theksoi: “Vazhdimisht vlersojmë dhe zbatojmë mundësi të ndryshme për të përmirësuar efikasitetin e kompanisë. Kur të jetë e nevojshme, ne do të marrim vendime të vështira në mënyrë që të sigurojmë suksesin tonë afatgjatë. Disa nga këto vendime mund të ndikojnë në fuqinë tonë punëtore.”