Dallaveret bllokojnë tenderin 10 milionësh për spitalin e Ferizajt
Kur gjithçka dukej të kishte përfunduar dhe Ferizaj do të bëhej me spital, janë ngritur dyshime të reja për dallavere të Ministrisë së Shëndetësisë me tender.
Lajme
Pesë kompani kanë deponuar ankesa në Gjykatën e Tenderëve, siç njihet ndryshe Organi Shqyrtues i Prokurimit për shkelje të evidentuara në procesin e përzgjedhjes së kompanisë fituese.
Ato dyshojnë se Ministria e Shëndetësisë pa të drejtë ka shpërblyer me tender rreth dhjetë milionësh konzorciumin “FAVOR ING & AS ING & ÇLIRIMI” për ndërtimin e Spitalit në qytetin e Ferizajt.
Gazeta Fjala mëson se deri më tani për këtë tender janë ankuar “Alko-Impex”, “Pevlaku sh.p.k”, “Arbëria com” dhe “Olti Trasing & Beni Com”, si dhe kompania “Al-Trade”.
Kjo e fundit ishte shpërblyer dy herë me tender edhe pse në garë kishte kompani që ofronin çmim më të lirë.
Organi Shqyrtues i Prokurimit Publik pas shkeljeve të evidentuara e ktheu procesin në pikën zero.
Në të dyja rastet pati disa kompani që shtruan pretendimet e tyre përmes ankesave në OSHP.
Ndërkohë, prej 20 kompanive sa ishin në garë, 7 prej tyre kishin ofruar çmim më të lirë se kompania fituese.
Ish-zyrtarja e kompanisë në komision e Ministrisë
Por vendosja për një kompani me çmime më të shtrenjtë nuk ishte shkelja e vetme.
Në komisionin vlerësues, Ministria e Shëndetësisë e pati vendosur ish-zyrtaren e kompanisë “Al Trade”. Bëhet fjalë për Donjeta Berisha-Reçica, e cila sipas dokumenteve që posedon Gazeta, është njëra prej katër anëtarëve që ka vendosur në tenderin për “Ndërtimin e spitalit në Ferizaj”.
Berisha-Reçica vite më parë në “Al Trade” kishte ushtruar detyrën e zyrtares në administratë dhe ngritë dyshimet për konflikt interesi në këtë proces. Në dokumentacionet që ka siguruar gazeta, Reçica prezantohet si anëtare e komisionit vlerësues, me përgatitjen profesionale “inxhiniere e diplomuar”.
Sipas kontratës së publikuar nga Ministria e Shëndetësisë më 16 nëntor 2016, punimet për ndërtimin e këtij spitali parashihej t’i bënte kompania “AL-TRADE”. Por nuk kishte shkuar shumë kohë si dhe tenderi ishte anuluar.
Përpjekja e dytë e Ministrisë se Shëndetësisë
Pasi procesi u kthye në piken zëro, Ministria e Shëndetësisë vendosi që tash projektin t’ia besoj tri kompanive tjera në garë. Përkatësisht operatorëve ekonomik, “FAVOR ING” & “AS ING” & “ÇLIRIMI”.
Madje në kontratën të bërë publike në Komisionin Rregullativ, thuhet se tenderi milionësh nga ana e këtyre kompanive pritet të nënshkruhet me 31 mars të këtij viti.
Megjithëkëtë tenderi sërish është bllokuar në Gjykatën e tenderëve. Kjo ndodhi pas ankesës se disa prej kompanive në garë me pretendimin se u është bërë e padrejtë.
Kujtojmë se Agjencia Kundër Korrupsionit kohë më parë i kishte bërë dy opinione negative për procedurat e prokurimit të ndjekura nga Spitali Regjional i Ferizajt, ku flitej për anën e “errët” të procedurave tenderuese nga ky autoritet kontraktues.
Ndryshe, projekti i ndërtimit të spitalit do të jetë 3 vjeçar. Ai do të ndërtohet afër Parkut të Lirisë, lokacion ky i caktuar nga Kuvendi i Komunës së Ferizajt. /Gazeta Fjala/