Kryeministri në ikje i Serbisë, Ivica Dacic, ka deklaruar sot se qëndrimi i Serbisë lidhur me Ukrainën do të jetë i “balancuar”, në përputhje me rrugën europiane, por edhe në miqësi me Rusinë.

Dacic është lideri i dytë serb i cili u deklarua i paanshëm lidhur me krizën në Ukrainë, pas zëvendësit të tij në Qeverinë e Serbisë, Aleksandar Vucic.

Ai ka thënë se neutraliteti do të jetë qëndrim edhe i Qeverisë së re të Serbisë, që pritet të formohet.

“Ky do të jetë qëndrimi i Qeverisë së re. Rusia është miku tradicional i Serbisë, ndërsa Serbia është në rrugën drejt integrimit europian. Kështu që, ky qëndrim duhet të jetë i balancuar dhe të jetë në interesin tonë”.

Ai tha se shumë shtete të cilat i “mbajnë leksione” Serbisë për sovranitetin dhe integritetin territorial, kanë qenë të para që e kanë njohur pavarësinë e Kosovës.

“Çështja e Kosovës e ka hapur ‘Kutinë e Pandorës’. Ndërsa, ata që e kanë hapur, të mendojnë tani se çfarë do të bëjnë me këtë”.