Sulmuesi i Atletico Madridit, Diego Costa është duke e fituar betejën e tij për rikuperim për ndeshjen vendimtare për titull të kampionit në La Ligë kundër Barcelonës.

Reprezentuesi spanjoll mungoi në barazimin 1:1 me Malagan të dielën për shkak të një lëndimi në kofshë, por u stërvit në palestër të hënën dhe pritet të përshpejtojë intensitetin e punës në ditët në vazhdim.

Costa punoi së bashku me portierin Thibaut Courtois ndërsa mesfushori Cristian Rodriguez po ashtu synon që të rikthehet sa më parë nga një dëmtim.

Courtois u lëndua në fundjavën e shkuar në Vicente Calderon por pritet të jetë titullar në Camp Nou të shtunën.

Trajneri Diego Simeone beson se edhe Costa do të jetë pjesë e ekipit. “Ai është duke avancuar mirë. Do të shohim se si do të ndihet para ndeshjes”, u shpreh ai.

Nëse është i gatshëm, sulmuesi 25-vjeç, i cili ka shënuar 36 gola në 50 paraqitje për Atleticon këtë sezon, do të luajë në ndeshjen e tij të fundit në La Ligë, para transferimit të pritur në Chelsea.