Cech në shitje
Menaxheri i Chelseas, Jose Mourinho ka bërë me dije se Petr Cech mund të largohet nga klubi gjatë këtij afati kalimtar të verës. ‘Special One’ i është referuar Mark Schwarzerit si portieri i dytë i ekipit.
Sport
Jose Mourinho ka dhënë indikacione se Petr Cech mund të largohet nga Chelsea gjatë këtij afati kalimtar të verës.
Pas rikthimit të Thibaut Courtois nga periudha e huazimit në Atletico Madrid, qarkullojnë spekulime se reprezentuesi i Republikës së Çekisë do të humbë statusin e titullarit në Stamford Bridge.
Dhe, menaxheri Jose Mourinho ka shtuar gjasat për largimin e Cechut duke iu referuar Mark Schwarzerit si “portieri i dytë”.
“Petr është duke luftuar për pozitën e tij por Thibaut është portieri më i mirë i ri në botë, nuk ka dyshime”, deklaroi Mourinho për “Evening Standard”.
“Ata do të luftojnë dhe për mua është një problem i mirë sepse duhet të marrim një vendim. Ne jemi një klub që dëshiron të jetë i fuqishëm dhe dëshiron të ketë mundësi të mira për të luftuar për tituj dhe të ketë konkurrencë për vende”, shtoi ai.
“Por, e di se Mark Schwarzer është portier shumë i mirë, dhe është i gatshëm të jetë portieri ynë i dytë, njësoj sikurse në edicionin e kaluar kur bëri paraqitje të mira se herë që patëm nevojë për të”, përfundoi Mourinho.