Marrëveshjen e mirëkuptimit për ndërtimin e këtij objekti, që do ta financojnë BE-ja dhe Këshillit koordinues i qeverisë serbe për Luginën  e Preshevës, e kanë nënshkruar të mërkurën kreu i Komunës së Bujanocit, Nagip Arifi, dhe dekani i Fakulteti Ekonomik të Suboticës, Nenad Vunjak, kurse ishin të pranishëm edhe shefi i delegacionit të BE-së në Serbi, Michael Davenport, shefi i misionit të OSBE-së në Beograd, Pieter Burkhard etj.

Sipas Davenport, nënshkrimi i marrëveshjes është mbase edhe hapi më i rëndësishëm në ndërtimin e një shkolle të vërtetë të arsimit të lartë në Bujanoc.

“Me këtë krijohen kushtet për zhvillim afatgjatë të arsimit universitar në këtë anë”, tha ai.

“Ndërtimi i objektit do t’iu mundësojë njerëzve të rinj nga Bujanoci dhe Lugina – shqiptarëve, serbëve, romëve e të tjerëve që të realizojnë të drejtën në arsimim dhe të zhvillojnë potencialet e tyre / do të mund të planifikojnë ardhmërinë në vendin e vet në vend se të planifikojnë largimin”.

Nagip Arifi shprehu kënaqësinë me nënshkrimin e kësaj marrëveshje, duke shtuar se nga sot Bujanoci do të mund të quhet qytet universitar.

“Aty ku hapen shkollat e fakultetet, aty mbyllen burgjet”, theksoi Arifi.

Në Bujanoc tash e tre vjet punon paralelja e Fakultetit Ekonomik, të cilën momentalisht e vijojnë 256 studentë – shqiptarë, serbë dhe romë, kurse në vjeshtë regjistrohet gjenerata e katrat, që pritet të ketë rreth 350 studentë.