Samir Nasri nuk pret që ta përfaqësojë Francën në Botërorin ‘Brazil 2014’, duke insistuar se evenimentin më të rëndësishëm të futbollit në botë do ta ndjek nga televizori.

Nasri u rikthye në formë tek Manchester City këtë sezon, duke shkëlqyer nën drejtimin e menaxherit Manuel Pellegrini, ndërsa klubi nga Manchesteri e fitoi titullin e dytë në tri sezonet e fundit të dielën.

Sidoqoftë, Nasri nuk beson se do ta marrë një ftesë nga trajneri Didier Deschamps për Botëror, përkundër faktit se ishte njeriu i ndeshjes ndaj West Hamit në ndeshjen e fundit të sezonit dhe pati paraqitje brilante këtë edicion.

“Mendoj se përzgjedhja është bërë. Unë e respektoj vendimin e përzgjedhësit. Do ta shikoj Botërorin në televizor”, deklaroi ish futbollisti i Arsenalit për televizionin francez ‘Canal Plus’.

“Nëse je startues në një klub si Manchester City dhe i fiton dy tituj, nuk mjafton, atëherë nuk kam se çka të bëj më tepër”, vazhdoi ai.

Nasri ishte dënuar me tri ndeshje nga Federata Franceze e Futbollit, pas përplasjes që e pati me gazetarë gjatë ‘Euro 2012’ në Poloni e Ukrainë.