Pulat, janë stërvitur intensivisht për muajt e fundit duke u përgatitur për kampionatin e tyre botëror. Ambienti në të cilin është kryer kampionati është një pub rural i quajtur “Barley Mow Pub” në një fshat të vogël të quajtur Bonsall.

Çdo vit, 30 deri në 40 nga pulat më të shpejta të botës vrapojnë përgjatë një piste e duke respektuar kritere strikte ndërkombëtare…ato duhet të kenë të dyja këmbët pas vijës së startit dhe nuk lejohet asnjë çukitje. I gjithë eventi, më i madhi i vitit për fshatin Bonsall, përfundon me shpalljen e pulës më të shpejtë në botë, transmeton lajmi.net.

“Ka disa persona që janë me të vërtetë shumë seriozë. Djaloshi që fitoi vitin e shkuar, ka fituar dy herë brenda tre vjetëve dhe aktualisht ai është trajnues. Është vetëm 10 vjeç dhe është shumë serioz”, u shpreh Colette Dewhurst, organizatore e kampionatit.

Gara e këtij viti u mbajt në një ditë vere tipike angleze, me një shi të lehtë dhe një diell që herë dilte e herë fshihej.

Disa qindra spektatorë ishin të pranishëm dhe bënin tifozllëk për garuesen e preferuar, disa prej të cilave, ndodhte që edhe të humbnin interesin për vijën e finishit, e disa të tjera ishin më të interesuara që të bënin luftë me njëra-tjetrën.

Gara u fitua nga pula që quhej “Cooked it”, dhe në vend të dytë u rendit Pluckedit, që e kishte fituar eventin edhe më herët. Trajner i pulës fituese ishte Jack Allsop, një 9 vjeçar nga Ible në Derbishajër, që ka një koleksion pulash atlete.

“Unë mendoj se ajo është pula më e shpejtë në botë dhe ka shumë rekorde botërore, është e paarritshme”, thotë Jack Allsop, trajner.

Më herët, ai e ka fituar garën edhe tre herë të tjera. /Lajmi.net/