Bizneset maqedonase kërkojnë largimin e pengesave tregtare me Kosovën
Biznesmenët kërkojnë që qeveria përmes marrëveshjeve me vendet fqinje t’i zvogëlojë pengesat administrative dhe me këtë të përshpejtohet shkëmbimi tregtarë mes vendeve të rajonit.
Lajme
Të kota janë investimet në infrastrukturën rrugore nëse ka pengesa të shumta administrative për qarkullimin e mallrave mes vendeve të rajonit. Ky është konkluzioni i komunitetit të biznesit ë pranë Odës Ekonomike të Maqedonisë Veriperëndimore (OEMVP).
“Për të ardhur një transformator nga Prishtina në Maqedoni, nevojiten 5 deri në 7 ditë, ose nga Hani i Elezit e deri këtu sërish nevojiten 5-7 ditë. Një ditë më parë duhet të lajmëroheni në drejtorinë e doganave në Prishtinë që t’ju përgatitin dokumente për eksport të përkohshëm. Për t’u nisur kamioni, malli doganohet vetëm në Prishtinë. Kur të arrijë këtu, e njëjta procedurë, një ditë e paraqisni dhe dy ditë për doganim”, tha Ace Antevski, nga kompania Rade Konçar.
Biznesmenët thonë se janë në hall me kontrollet e dyfishta doganore. Ata kërkojnë kontrollim vetëm të njëhershëm mallrave, njofton Alsat-M.
“Duhet të bisedojmë edhe me partnerët për vendosjen e kontrolleve transitore, sidomos kur është fjala për mall në lëvizje. Nëse kemi koordinim të mirë, komunikim të mirë elektronik mes shërbimeve, ndërsa mendoj se shteti jonë është i gatshëm për këtë lloj komunikimi, do mund të mendohet për një sistem të kontrollit të njëanshëm të mallrave”, u shpreh Antoni Peshev nga Oda Ekonomike e Maqedonisë.