BE-ja do ta fillojë ratifikimin e marrëveshjes me Britaninë javën e ardhshme

Deputetët e Parlamentit Evropian kanë thënë se presin që ky institucion t’i fillojë procedurat për ratifikim të marrëveshjes me Britaninë e Madhe për shkëputjen e këtij shteti nga Bashkimi Evropian gjatë javës së ardhshme, pavarësisht vështirësive të Londrës për ta miratuar atë në kuvend.

Bota

22/01/2019 18:36

Partia opozitare e laburistëve ka kërkuar që për këtë çështje të organizohet një referendum i ri, ndonëse kryeministrja May nuk ka shprehur gatishmëri për një gjë të tillë. Bashkimi Evropian i ka thënë Britanisë së Madhe se është në pritje të gjetjes së një zgjidhjeje të pranueshme nga spektri i gjerë politik në vend.

Zyrtarët e Bashkimit Evropian gjithashtu kanë premtuar se ata mund të bashkëpunojnë për hartimin e një teksti për përcaktimin e marrëdhënieve të ardhshme me Britaninë e Madhe. “Shpresojmë që ta nisim procedurën në fund të janarit”, tha deputetja  e Parlamentit Evropian, Danuta Hubner.

Ajo pret që marrëveshja me Britaninë të dërgohet në Parlamentin Evropian të mërkurën ose të enjten e ardhshme në mënyrë që procesi i ratifikimi të saj të përfundojë para datës 29 mars, e cila paraqet afatin e fundit për dalje të Britanisë së Madhe nga Bashkimi Evropian, shkruan “Reuters”, transmeton Gazeta Express.