Bahtiri sjell një kompani amerikane në Mitrovicë, premtohen 600 vendeve të punës

Ndërtimi i fabrikës së riciklimit të mbeturinave për prodhimin e energjisë elektrike nuk sjellë dëme anësore sa i përket mjedisit, ndërsa do të punësojë rreth 600 punëtorë.

Lajme

16/03/2015 14:46

Kështu u tha gjatë debatit publik të organizuar nga Komuna e Mitrovicës, lidhur me raportin e ndikimit të fabrikës së riciklimit të mbeturinave për prodhimin e energjisë elektrike dhe Biodisellit “Green 3 Power ” të hënën në Mitrovicë.

Pronari i kompanisë amerikano-suedeze “Green 3 Power ”, Tom Roberts, tha veç tjerash se nga kjo fabrikë parashihet të shiten rreth 400 mijë litra të dizelit, që do të mjaftonte funksionimin e plotë produktiv të kësaj fabrike dhe realizimin e synimeve të saj.

Ai ka folur po ashtu edhe për infrastrukturën, për të cilën tha se në bazë të përvojës së deritashme, do të merren të gjitha masat për parandalimin e ndotjes së ambientit dhe ruajtjes së shëndetit të qytetarëve në përgjithësi.

Në anën tjetër, kryetari i Mitrovicës Agim Bahtiri dhe nënkryetari i Skenderajt, Fadil Nura, kanë kërkuar nga institucionet e Republikës së Kosovës që sa më parë të lëshohen certifikatat e nevojshme dhe puna të nis menjëherë.

Ata premtuan se në këtë fabrikë pritet të punësohen rreth 600 punëtorë, duke përfshirë këtu edhe 220 punëtorët që aktualisht janë pjesë e kompanisë Uniteti, e cila bënë grumbullimin e mbeturinave në rajonin e Mitrovicës.

Kompania “Green 3 Power” e cila është zotuar se do të investojë një shumë të konsiderueshme në riciklimin e mbeturinave si dhe prodhimin e energjisë elektrike, ka lidhur kontratë me komunën e Mitrovicës mbi shfrytëzimin e pronës komunale për 99 vite dhe pritet të ndërtohet në zonën e lirë ekonomike në fshatin Frashër të Mitrovicës.