Avni Arifi demanton mediat Serbe: Nuk do të takohem nesër me Gjuriqin

Mediat serbe kanë raportuar sot se shefi i ekipit negociator të Prishtinës, Avni Arifi, si dhe drejtori i të ashtuquajturës zyrës për Kosovën në Qeverinë e Serbisë, Marko Gjuriq, do të takohen nesër në Bruksel në kuadër të fillimit të dialogut teknik mes Prishtinës dhe Beogradit.

Lajme

21/06/2018 17:36

Agjencia e lajmeve “Tanjug”  duke iu referuar burimeve të veta, raportoi sot se ky takim i cili do të zhvillohet në Bruksel, do të jetë nën ndërmjetësimin e drejtoreshës për Ballkanin Perëndimor dhe Turqinë, si dhe zëvendësdrejtore menaxhuese në Shërbimin Evropian të Veprimit të Jashtëm, Angeline Einhorst, shkruan lajmi.net.

Mirëpo këto raportime i ka demantuar vetë shefi i ekipit negociatior të Kosovës, Avni Arifi.

Ai në një prononcim për lajmi.net ka thënë se një takim i tillë nuk është në plan të zhvillohet dhe nuk ka diçka të vërtetë nga këto raportimeve të mediave serbe.

Ndryshe, presidenti i Kosovës, Hashim Thaçi, dhe ai i Serbisë, Aleksander Vuçiq, do të zhvillojnë një takim të dielën në Bruksel në kuadër të fillimit të raundit të ri të bisedimeve Prishtinë- Beograd./Lajmi.net/