ATK-ja mbledh 6 milionë euro më shumë në këtë janar se në atë të vitit 2017
Administrata Tatimore e Kosovës përmes një komunikate për media ka njoftuar se të hyrat për muajin janar 2018 kanë shënuar rritje për 6 milionë euro ose 13 % më shumë se muaji janar i vitit 2017.
Lajme
Vlera e inkasuar për muajin Janar është 51.4 milionë euro, ndërsa në raport me planin janë realizuar të hyra në vlerë prej 2.6 milionë euro më shumë ose mbi 5.3 %. Sipas ATK-së, është realizuar 12% e planit të të hyrave për vitin 2018.
“Rritja e të hyrave është rezultat i ngritjes së nivelit të përmbushjes vullnetare të tatimpaguesve, punës së palodhshme të zyrtarëve të administratës tatimore, modernizimit të shërbimeve tatimore dhe rritjes së komunikimit me tatimpaguesit”, thuhet në komunikatën e ATK-së.
Theksohet se gjatë kësaj periudhe janë mbledhur mbi 9.9 milionë euro Kontribute Pensionale, pra gjithsej të hyra gjatë kësaj periudhe raportuese (Tatimet dhe Kontributet Pensionale) janë në vlerë prej mbi 61.3 milionë euro.
