Nëse identiteti i tij konfirmohet, për policinë dhe shërbimet sekrete britanike do të jetë një goditje e rëndë, shkruan BW.

Abu Izzadeen, i njohur edhe me emrin e lindjes Trevor Brooks, i përket pjesës radikale të grupit të krijuar dhe strukturuar përreth xhamisë së zonës Finsbury Park në Londër, ku bënin pjesë edhe autorët e atentateve të korrikut 2005 në metronë e kryeqytetit britanik.

Bëhet fjalë për një grup që ka lindur me nismën e Omar Bakri dhe Anjem Choudary, dy persona që për vite të tërë i kanë bërë lobing Al Kaedës në Europë dhe që për këtë arsye ndodhen të mbyllur njëri në një burg libanez dhe tjetri në një britanik.

Ndërkohë që avokati i Brooks ka përgënjeshtruar zërat që klienti i tij të jetë përgjegjës për sulmin. “Është ende në burg”, ka thënë ai. Sido që të jetë, për të pasur një përgjigje më të saktë do të duhet të pritet versioni zyrtar i Scotland Yard.

Mediat britanike shkruajnë se Ebu Izzadeen është i njeri i njohur për policinë, për idetë e tij të radikalizuara.

Në profilin e tij në Twitter, i cili prej ditës së djeshme nuk është më aktiv, Abu Izzadeen shkruan për afërsinë e tij me botën e xhihadit dhe për idetë e tij të rrezikshme.

Çfarë fshihet në profilin e tij në Twitter!

Në të nuk habit fakti se Abu Izzadeen kishte 176 ndjekës dhe ndiqte 22 profile, të gjithë të lidhur me botën e xhihadit ose që kishin të bënin me luftën në Irak dhe Siri.

Në fotot e publikuara në llogarinë e tij shfaqen flamuj të ISIS-it, të luftëtarëve të armatosur dhe martirë të luftës së shenjtë.

Por kjo gjë nuk është mister për policinë britanike, pasi vite më parë 44-vjeçari ishte arrestuar sepse mblidhte fonde për të financuar organizata terroriste.

Ndërsa në vitin 2012 sipas mediave angleze, Abu Izzadeen kishte tentuar të shkonte në Siri për të luftuar përkrahë xhihadistëve.

44-vjecari ishte regjistruar në Twitter në vitin 2012, ndërsa në vitin 2014 ai u bë më aktiv, periudhë kur regjistrohej numri më i madh i ndjekësve të tij. Viti ky kur Shteti Islamik u bë një forcë e madhe në luftën civile siriane.