Me 150 njerëz në bord avioni i kompanisë ajrore Germanwings, degë e Lufthansës, u rrëzua në Alpet e Francës në një zonë të paarritshme ne lartësi 1500 metra. Qindra forca shpëtimi u dërguan menjëherë në vendin e aksidentit, në malet Estrop, por nuk mundën të bënin më dot asgjë.

Asnjë pasagjer nuk ka mbijetuar, njoftoi policia franceze. Shumica e udhëtarëve ishin gjermanë, në mesin e tyre edhe 16 nxënës nga qyteti Haltern në landin Nordrhein-Westfalen, të cilët kishin qenë në Spanjë për një kurs të gjuhës spanjolle.

“Vendi i ngjarjes është një vend tmerri”, tha ministri i Jashtëm gjerman, Frank-Walter Steinmeier, i cili shkoi menjëherë atje pas katastrofës. Ambasadorja gjermane në Francë, Susanne Wasum-Rainer, foli për një “ditë të zezë për Gjermaninë, Spanjën dhe Francën.”

Alarmin e dhanë autoritetet franceze paradite. Avioni kishte pësuar rënie gjatë fluturimit për arsye të panjohura dhe ishte zhdukur nga monitorët e radarëve. Avioni i nisur paradite nga Barcelona u rrëzua rreth 100 kilometër në veri të Nicës. Pjesë të avionit janë gjetur në zonën ndërmjet Digne dhe Barcelonnette në Alpet e jugut.

Gjetja e trupave të pajetë do të vazhdojë ndoshta me ditë të tëra për shkak të rajonit tepër të vështirë. Zona e rrëzimit të avionit ndodhet në Alpet franceze në një zonë me borë, të pakalueshme për makinat.

Shkaku i fatkeqësisë më të madhe ajrore në Evropë prej vitesh, është fillimisht i paqartë. Thomas Winkelmann, shefi ekzekutiv i kompanisë Germanëings, tha se avioni arriti lartësinë e udhëtimit prej më shumë se 11 mijë e 500 metra pasi u largua nga Barcelona në Spanjë drejt Dusseldorfit në Gjermani, por ai tha se avioni më pas u ul për tetë minuta rresht para se kontrolli i trafikut ajror francez të humbiste kontakt me të në lartësinë gati 1 mijë e 800 metra.

Autoritetet franceze të fluturimit thanë se nuk pati thirrje për ndihmë nga pilotët e avionit, por se kontrollorët e trafikut ajror shpallën emergjencë pasi humbën kontakt me kabinën.

Qeveria gjermane ka ngritur ndërkohë një shtab krize. Kancelarja Angela Merkel, e cila anuloi të gjitha takimet e ditës së sotme, shprehu tronditjen e saj të thellë për aksidentin. Ajo do të shkojë sot në vendin e rrëzimit të avionit në Francë. /DW/BBC/lajmi.net/