ASK: Bien çmimet e konsumit për 0.8 për qind
Gjatë muajit prill kanë pësuar rënie çmimet e konsumit për 0.8 për qind, krahasuar me muajin mars.
Lajme
Sipas të dhënave të Agjencisë së Statistikave të Kosovës (ASK), kjo rënie vërehet tek produktet siç janë qumështi, vezët, djathi, rryma dhe lëndët djegëse.
“Rënie e indeksit të harmonizuar të çmimeve të Konsumit vërehet te nëngrupet qumësht, djathë dhe vezë -1.0%, rrymë, gaz dhe lëndë djegëse të tjera -15.7%, aplikimi i tarifave verore të energjisë elektrike nga 1 prill deri më 30 shtator 2015. Këto dy grupe të konsumit ndikuan në rënien e indeksit të përgjithshëm për -1.1 për qind”, thuhet në statistikat e ASK-së.
Po ashtu, sipas këtyre analizave, rënia u neutralizua kryesisht nga ngritja e indeksit të harmonizuar të çmimeve të konsumit tek nëngrupet si drithërat me 1.3%, mishi me 1.5% , pemët me 6.4%, perimet me 14.2%, duhani me 4.1% si dhe rryma, gazi dhe lëndë djegëse të tjera për 6.1%, me një ndikim të përbashkët të këtyre nëngrupeve prej 1.5 për qind në IHÇK.
Shkalla e inflacionit e matur në muajin prill 2015, me muajin prill 2014, ishte-0.4%, transmeton KosovaPress.