Mesfushori i Arsenalit, Mesut Ozil beson se ekipi i tij mund ta arrijë finalen e Ligës së Kampionëve.

Ekipi i Arsene Wenger u kualifikua në këtë kompeticion për herë të 17-të rresht pasi e eliminoi Besiktasin të mërkurën, por kishte dështuar ta kalojë të tetën e finales në katër sezonet e fundit.

Siqodoftë, përfaqësuesi gjerman beson se këtë sezon, Arsenali do të shkojë larg, ndërsa do të marrë pjesë në Grupin D, së bashku me Borussia Dortmund, Galatasaray e Anderlect.

“Ne e kemi përforcuar skuadrën. Gjithashtu duam të tregojmë se mund të luajmë më mirë në Ligën e Kampionëve”, deklaroi Ozil për reporterët.

“Është një grup i vështirë, e njohim mirë Borussia Dortmundin, por nuk kemi nevojë të frikësohemi nga askush. Kemi potencial për ta arritur finalen. Duhet të besojmë se gjithçka është e arritshme”, vijoi ai.

“Jo shumë njerëz kanë menduar se Atletico Madridi do ta arrinte finalen. Nëse punon fort, gjithçka është e mundshme”, përfundoi Ozil.