Arrestohet i dyshuari për falsifikim të parave

Policia e Kosovës ka arrestuar një person i cili dyshohet se ka falsifikuar para.

Lajme

13/02/2019 17:13

Drejtoria për Hetimin e Krimeve Ekonomike dhe Korrupsionit në Prishtinë, pas pranimit të informatës se një i dyshuar përmes biznesit të tij, po vë në qarkullim monedha që dyshohet se janë të falsifikuara, ka filluar dhe ka zhvilluar hetimet për disa javë ndaj një të dyshuari, shkruan lajmi.net.

Siç bëhet e ditur në njoftimin e Policisë, sot hetuesit policorë së bashku me inspektorë nga Ministria e Tregtisë dhe Industrisë, kanë inspektuar aktivitetin tregtar të të dyshuarit në Prishtinë.

Policia tek i dyshuari ka gjetur dhe më pas ka sekuestruar një shumë monedhash metalike.

Në pronësi të të dyshuarit janë gjetur 344 euro të monedhës metalike 2 euro si dhe 236 euro të monedhës metalike 1 euro.

Gjithsej janë konfiskuar monedha metalike në vlerë prej 580 euro.

I dyshuari H. B. i lindur në vitin 1968, është arrestuar dhe me aktvendim të prokurorit dërgohet në ndalim policor për 48 orë. /Lajmi.net/