Përmes një letre të hapur drejtuar Organizatës Botërore të Shëndetësisë, ky grup është shprehur se të dhënat mbi virusin problematik e kthejnë në një çështje joetike faktin e të zhvilluarit të këtyre lojërave.

Ata i bëjnë thirrje OBSH-së që të rishikojë urgjentisht udhëzimet mbi Zikën, një virus që lidhet me defekte serioze te të porsalindurit. Megjithatë, Komiteti Ndërkombëtar Olimpik njoftoi gjatë këtij muaji se, nuk shohin asnjë arsye për të shtyrë Olimpiadën për shkak të këtij virusi.

Sipas medieve ndërkombëtare, letra është nënshkruar nga 125 shkencëtarë ndërkombëtarë, mjekë dhe gjykues të etikës mjekësore, nga institucione të tilla si Universiteti i Oksfordit, por edhe i Harvardit dhe Yale në Shtetet e Bashkuara.

Shkencëtarët citojnë dështimin e programit të çrrënjosjes së mushkonjave në Brazil, si dhe sistemin “e dobësuar” shëndetësor të vendit amerikano-latin si arsye bindëse për të shtyrë apo transferuar diku tjetër Olimpiadën, gjithmonë në emër të “shëndetit publik”.

“Një risk i panevojshëm do t’u paraqitet rreth 500 mijë turistëve të huaj që do të zbarkojnë nga të gjitha vendet për të ndjekur Lojërat Olimpike, të cilët mund të marrin virusin dhe kur të kthehen në vendet e tyre të përbëjnë rrezik endemik”, thuhet në letër.

Ndërkohë, përhapja e gjerë e sëmundjes përmes mushkonjave nisi në Brazil rreth një vit më parë, ndërkohë që tashmë, më shumë se 60 vende dhe territore të botës vazhdojnë të hasin probleme me transmetimin e këtij virusi.