Agim Aliu: Na presin shumë punë për ta bërë Ferizajn ashtu siç e duam
Kryetari i zgjedhur i Ferizajt, Agim Aliu ka falënderuar votuesit në qytetin e Ferizaj pas fitores së djeshme.
Lajme
Ai ka premtuar se do të jetë zëri i të gjithë qytetarëve pa dallim partie politike.
Lexo postimin e plotë:
Mbrëmë, ferizajasit dëshmuan se e duan ndryshimin. Pushteti i ri është pushteti juaj, ju që jeni forca ime, vullneti për të bërë Ferizajn, qytet elitar.
Jam thellësisht falenderues dhe i emocionuar me mbështetjen e fuqishme të gjithë qytetarëve, të rinjve e të moshuarve, burrave e grave që dhanë kontributin e tyre për ta bërë realitet fitoren.
Triumfi i djeshëm është triumfi i qytetarëve, zërit që thërret për ndryshim me punë konkrete.
Unë do të jem zëri juaj, kryetar i të gjithëve, përtej ngjyrave politike që bashkë të punojmë për të ardhmen e përbashkët në qytetin tonë.
Bashkë na presin shumë punë për ta bërë Ferizajn ashtu siç e duam.
Faleminderit të gjithëve!
Na priftë e mbara!
P.S. Kërkoj ndjesë ndaj gjithë atyre, qindra mesazheve e thirrjeve telefonike që nuk kam mundur t’i përgjigjem. Ju faleminderit për urimet!