Ai këtë e ka bërë, pas bujës së madhe që ka bërë një zyrtare e Kosovës, për vjedhjen në Bruksel.

Kështu, Abdixhiku ka renditur disa “hajni” të ndodhura në institucionet më të mëdha të vendit, e të cilat kanë ndodhur vetëm sivjet.

Megjithatë, disa komentues në këtë postim të Abdixhikut e kanë bërë bashkëfajtore për hajni edhe LDK-në.

“Ne shumicen e tyre LDK me krenari ka marr pjesë (po mendoj ne rrenjosjen e kriminalitetit)!”, ka shkruar një komentues, raporton lajmi.net.

“Lumir mas pari njeri duhet me pastru oborrin e vet, e masnej me dal me pastru sokakun”, ka shkruar një tjetër.

Postimi i plotë i Abdixhikut:

Meqë qenka temë hajnia, ajo e një zyrtareje në Bruksel, t’ua kujtoj për pak këtë tjetrën, të Kosovës, që po na ndodhë vetëm sivjet:

– 53 MILIONË tuajat po i jepen Bechtel Enkas, pa asnjë vlerësim, pa asnjë verifikim. Si tall pazari; fiks. Po e shesin madje si kursim.

– 11 MILIONË tuajat po i jepen serbëve në Veri, për tua pagaur rrymën veç për një vit. Tash e njëzet vjet s’paguhet rryma atje.

– 36 MILIONË tuajat po i jepen PTK-së, për t’ia mbuluar dëmet e kontratave kriminale, punësimeve militante, e llukseve menaxheriale. Për të gjitha këto, zero përgjegjësi.

– 10 MILIONË tuajat po i jepen Qeverisë. Duan dyfishim page për vete si shpërblim. Paga e re është dhjetëfish më e larta se mesatarja; si asnjë vend tjetër në botë.

– 3 MILIONË tuajat po i jepen zëvendësministrave, armatës më të madhe të badihavgjinjëve në Evropë. Janë bërë plot 80 sosh; pa punë, pa obligim, pa asnjë detyrim.

– 80 MILIONË tuajat po i jepen listave fiktive të veteranëve – të cilat vazhdojnë të rriten edhe këtë ditë. Gjashtëdhjetë milionët e ndara në fillim nuk po mjaftojnë; duhet shtuar edhe njëzet shtesë.

Dhe brengosemi për imazh mandej.

Çfarë imazhi japin gjithë këto?