138 kompani lirohen nga TVSH-ja, përfitojnë 2.1 mln euro
Ministri i Financave, Avdullah Hoti, ka treguar se në janar dhe shkurt, 138 kompani kanë përfituar 2.1 milionë euro lirime në import të makinerive prodhuese, lëndës së parë dhe teknologjisë informatike.
Lajme
“Gjatë këtyre dy muajve, vlera e importit të makinerive prodhuese, lëndës së parë dhe teknologjisë informatike ka qenë 12.4 milionë euro. Ministria e Financave, përmes autorizimeve të lëshuara nga Dogana dhe ATK, ka liruar 138 kompani nga pagesa e TVSH-së me rastin e këtij importi. Vlera e lirimeve ka qenë 2.1 milionë euro, që mund të merret si shumë me të cilën Qeveria po mbështet prodhimin vendor”, ka thënë Hoti.
Hoti ka treguar se Ministria e Financave, të cilën ai e drejton, është duke punuar me Doganën dhe ATK-në për të lehtësuar më tutje procedurat e marrjes së autorizimeve për të përfituar nga lirimet në pagesën e TVSH-së në import të makinerive prodhuese, lëndës së parë dhe teknologjisë informatike.
“ATK, në ditët në vijim, do të publikojë listën e kompanive që kanë marrë autorizime për lirim nga pagesa e TVSH-në në import”, ka thënë ai.