Drejtoria për Hetimin e Krimeve Ekonomike dhe Korrupsionit, gjatë një operacioni sot rreth orës 09:00 ka arrestuar (11) njëmbëdhjetë persona, me dyshimin se të njëjtit kanë kryer veprat penale “keqpërdorim i detyrës zyrtare, marrje e ryshfetit, raste të posaçme të falsifikimit të dokumenteve dhe legalizimi i përmbajtjes së pavërtetë.

Që nga viti 2009 deri në vitin 2012 këta persona kishin marrë ryshfet nga studentë të UP’së për regjistrimin e tyre në degë të ndryshme në universitet.

“Bazuar në hetimet policore personat e dyshuar, tashmë të arrestuar nga policia, gjatë periudhës kohore nga viti 2009 e deri në përfundim të vitit 2012, me qëllim të përfitimit material kanë pranuar shuma të ndryshme të parave (nga 4 mijë deri në 10 mijë euro) me qëllim të regjistrimit të studentëve në UP në Fakultetin e Mjekësisë, të Edukimit etj., duke u shërbyer me organizata studentore”, njofton komunikata e Policisë së Kosovës.

Të njëjtit po gjatë kësaj periudhe kanë përfituar shuma nga 100 deri në 500 euro, për kryerjen e provimeve nga lëndë të ndryshme mësimore, duke hyrë në provim në vend të studentëve tjerë, si dhe duke intervenuar tek profesorët për marrjen e notave kaluese.

Të gjitha veprimet dhe hetimet policore janë kryer nën autorizimin e prokurorit përkatës dhe me autorizimin e tij ndaj të dyshuarve është caktuar masa e ndalimit për 48 orë, për të vazhduar me procedurat e mëtejme hetimore, ku mund të ketë zgjerim të hetimeve edhe ndaj personave të tjerë.

Më poshtë ju sjellim emrat e personave të arrestuar sipas komunikatës nga Policia e Kosovës:

E. B. i lindur në vitin 1984,

R. Z. i lindur në vitin 1984,

K. G. i lindur në vitin 1986,

A. J. i lindur në vitin 1985,

L. B. i lindur në vitin 1987,

A. H. i lindur në vitin 1988,

G. M. i lindur në vitin 1984,

M. B. i lindur në vitin 1984,

A. H. i lindur në vitin 1984,

K. M. i lindur në vitin 1988,

M. M. i lindur në vitin 1983.