Hashim Thaçi, presidenti i parë me tranzicion
Nëse nesër zgjidhet president, Hashim Thaçi do të jetë presidenti i parë, që mandatin e tij do ta marrë me tranzicion.
Lajme
Kosova, deri më tash, asnjëherë nuk kishte pasur fatin që me procedurë të rregullt, presidenti në shkuarje t’ia dorëzonte mandatin presidentit të ri, sepse në të shumtën e rasteve atyre u ishte dashur që të japin dorëheqje për shkak të shkeljeve kushtetuese.
Pas vdekjes së Ibrahim Rugovës kur ishte në detyrë, në ulësen e të parit të shtetit kishte ardhur Fatmir Sejdiu, i cili sapo ishte votuar në Kuvendin e Kosovës kishte bërë betimin dhe nisur mandatin presidencial. Sejdiu, pas vendimit të Gjykatës Kushtetuese lidhur me postin e tij të ngrirë në LDK, e cila e kishte shpallur antikushtetues, ishte obliguar që të jepte dorëheqje pa e përfunduar mandatin e tij presidencial.
Pas tij, në ulësen e të parit të shtetit shumë shkurtë ishte ulur edhe Behgjet Pacolli. Njëjtë si Sejdiu, edhe Pacolli e kishte marrë mandatin menjëherë pas votimit të tij në Kuvendin e Kosovës. I dërguar nga opozita në Gjykatën Kushtetuese, zgjedhja e tij rezultoi me shkelje kushtetuese dhe Pacolli u detyrua të largohej shumë shpejt prej zyrës së të parit të shtetit.
Në të dy këto raste, tranzicionin e kishte bërë kryetari i Kuvendit, Jakup Krasniqi, si ushtrues detyre në mungesë të presidentit dhe jo si president formal.
Pas Pacollit, me një marrëveshje politike, si zgjidhje kalimtare në krye të shtetit erdhi Atifete Jahjaga, e cila gjithashtu mandatin presidencial e mori menjëherë pasi u votua dhe bëri betimin në Kuvendin e Kosovës.
Ndonëse u pa si zgjidhje kalimtare, Jahjaga tash po e përfundon gjithë mandatin e saj pesëvjeçar presidencial, kurse për herë të parë me procedurë të rregullt në krye të shtetit pritet të vjen Hashim Thaçi, i cili nesër pritet nëse do të votohet ose jo për president.
Por, edhe pse pritet të jetë i pari president që mandatin e tij do ta marrë me tranzicion, me procedurë të rregullt më 7 prill, kur edhe do ta bëj betimin, opozita e Kosovës për ta kundërshtuar ardhjen e tij në krye të shtetit, për nesër i ka thirrur simpatizantët e vetë për të protestuar kundër zgjedhjes së Thaçit.
Aktualisht Thaçi është lideri më i votuar në vend dhe fitues i zgjedhjeve prej vitit 2007. /Indeksonline/