Dhjetëra protestues kanë mbajtur pankarta me mbishkrimet “Një Mitrovicë, një Kosovë e bashkuar”, “Strukturat paralele të Serbisë po e shkatërrojnë Republikën”, “Qeveria e Serbisë e do veriun më shumë se Qeveria e Kosovës”, “Kur Agim” “Duam kthim në pronat tona”,ndërsa kanë paralajmëruar se ky është hapi i parë me qëllim organizimin, sensibilizimin dhe angazhimin qytetar për zgjidhjen e problemit të shqiptarëve në veri.

Përfaqësuesi i kësaj Iniciative, Bujar Voca tha se duke parë agresonin politik që shteti i Serbisë po ndërmerr në veri të Kosovës, duke kolonizuar në tërësi pjesën veriore të qytetit të Mitrovicës, heshtjen e bashkësisë ndërkombëtare dhe mosveprimin e Qeverisë së Kosovës, kjo Iniciativë me angazhim dhe presion qytetar do ta detyrojë BE-në dhe Qeverinë e Kosovës që t’i ndalin planet hegjemoniste të Serbisë për shkatërrimin e Republikës së Kosovës.

“Tashmë janë bërë disa vjet që Serbia ka vendosur shumë barrikada në veri me të cilat e ka ndarë Kosovën, i ka izoluar shqiptarët atje dhe po e pamundëson kthimin e shqiptarëve të dëbuar nga veriu i Kosovë. Sot në veri të Mitrovicës po ndërtohet një Serbi e vogël dhe ky është një proces që po ndodhë nga viti 1999. Serbia vetëm gjatë vitit 2000, përmes dhunës dhe agresionit dëboi nga Mitrovica veriore rreth 1500 familje me rreth 11 mijë anëtarë. Qeveria e Kosovës nuk ka as plan dhe as qëllim që t’i kthej shqiptarët në shtëpitë e tyre, ta shtrijë sovranitetin në veri dhe ta largojë Serbinë nga atje. Serbia vetëm brenda një viti investon qindra miliona euro për shkatërrimin e Kosovës në shërbim të qëllimit të saj për me ndaj Kosovën, me pamundësi stabilitetin politik duke mos i lejuar as serbët e Kosovës të integrohen në Republikën e Kosovës, ndërsa, Qeveria e Kosovës në krye me Isa Mustafën nuk ka ndarë asnjë cent për kthimin e shqiptarëve në veri dhe shtrirjen e sovranitetit në pjesën veriore të Kosovës. Ai ka potencuar se çelësi i stabilizimit të situatës dhe funksionalizimin e qytetit të Mitrovicës, është largimi i strukturave paralele në atë pjesë”, është shprehur ai.

Sipas tij, Qeveria e Kosovës duhet që për çdo vit të ndajë nga 5 milionë euro për kthimin e shqiptarëve në veri.

Ndërkaq, aktivistja e kësaj Iniciative, Gonxhe Qaushi, njëherësh banore e veriut të Mitrovicës, veç tjerash ka kritikuar kryetarin e Mitrovicës, Agim Bahtiri, për premtime të ndryshme, por që nuk janë realizuar asnjëherë.

“Sipas planit të Ahtisarit e dimë se Mitrovica e veriut duhet të jetë një komunë e re. Pra, jam në mbështetje të këtij plani, por jo me një komunë serbe. Agim Bahtiri ka dhënë mjaft deklarata se do t’i heq barrikadat por asnjë nga këto nuk është realizuar”, tha ai.

Në anën tjetër, Eroll Rudniku, ish banor i veriut të Mitrovicës, tha se politikanët e kanë future popullin në humnerë sa i përket qytetit të ndarë.

Protesta ka zgjatur rreth një orë dhe nuk është shënuar ndonjë incident.